1911ko azken egunetan ospatutako hauteskundeen emaitzak direla eta ez direla, giro nahasia bizi da Bermeon. Diferentzia politikoak hala bultzatuta, bi talde eratu dira: liberalak eta “anticaciquistak”. Zurrunbilo politikoak egoera kaotikoa darama herrira; alabaina, herrian ugaritzen ari diren liskarren, borroken eta eztabaiden artean, Julian Telletxea arrantzale gazteak maitemintzeko era aurkitzen du. Teresa, herriko talde liberalaren burukide baten alaba da; Julian berriz, nazionalista. Abuztuaren 12an Kantauri itsasoan, galerna ikaragarri eta bortitza agertzen da. Julianek eta beste marinel askok eta askok, herritik urrunegi, enbatari aurre egin beharko diote.